28-март күнү Борбордук Азиядагы Эл аралык университетинде World Speech Day алкагында жыл сайын өткөрүлүүчү англис тилиндеги коомдук сүйлөө сынагы “Speak to Inspire: The Battle of Words” болуп өттү.

Иш-чараны «Лингвистика. Англис тили» багыты уюштуруп, студенттердин коммуникациялык көндүмдөрүн, сынчыл ой жүгүртүүсүн жана англис тилинде ишенимдүү сүйлөө жөндөмүн өнүктүрүүгө өзгөчө көңүл бурат.

Бул жылы сынакка Кыргызстандын ар кайсы мектептеринин 9–11-класстарынын окуучулары жана колледж студенттери болуп, жалпы 26 катышуучу катышты. Катышуучулар өз алдынча өнүгүү, стереотиптер, технологиялар жана адамдык баалуулуктар сыяктуу актуалдуу темаларда мазмундуу жана таасирдүү баяндамаларды сунушташты.

Ар бир катышуучунун сөзү 3–5 мүнөттү түзүп, презентация менен коштолду. Сынак англис тилин билүү деңгээлин көрсөтүү менен катар, катышуучуларга өз ойлорун жеткирүүгө, угулууга жана башкаларды шыктандырууга мүмкүнчүлүк түздү.

Катышуучулардын иштери эл аралык калыстар тобу — МУЦАнын «Лингвистика. Англис тили» багытынын окутуучулары Berlin Barnett (АКШ), Lovina Aboki (Нигерия), Priska Priest (АКШ) жана Айжамал Абдылдаева (Кыргызстан) тарабынан бааланды.

Сынактын жыйынтыгы боюнча жеңүүчүлөр:

🥇 1-орун — Нурдинов Ильяз, ГТК 3-курс, «Котормо жана котормочулук иши»

🥈 2-орун — Курманбеков Арлен, 11-класс, «Ак-Бата» мектеби

🥉 3-орун — Идырова Карина, ГТК 3-курс, «Котормо жана котормочулук иши»

Жеңүүчүлөр өзүн-өзү өнүктүрүүгө арналган китептер менен сыйланып, бардык катышуучуларга сертификаттар тапшырылды.

Бул сынак төртүнчү жыл катары менен өткөрүлүп, университеттин академиялык жана коомдук жашоосунун маанилүү бөлүгүнө айланып, таланттуу жана максаттуу жаштарды бириктирип келет.

МУЦАнын «Лингвистика. Англис тили» багыты студенттерге англис тилин үйрөтүү менен гана чектелбестен, өз оюн эркин билдирүүгө, аудитория алдында ишенимдүү сүйлөөгө жана эл аралык чөйрөдө ийгиликтүү иш алып барууга керектүү көндүмдөрдү өнүктүрүүгө шарт түзөт.