2025-жылдын 22-октябрында Борбор Азия Эл аралык университетинде (БАЭУ) «Кыргыз Республикасынын БУУ системасы менен эл аралык интеграциясы» темасында студенттик илимий конференция тегерек стол форматында өткөрүлдү. Иш-чара БУУнун түзүлгөндүгүнүн 80 жылдыгына жана жыл сайын 24-октябрда белгиленүүчү Бириккен Улуттар Уюмунун күнүнө арналды.

Иш-чаранын негизги максаты БУУнун эл аралык тынчтыкты жана коопсуздукту камсыз кылуудагы, туруктуу өнүгүүнү илгерилетүүдөгү, адам укуктарын коргоодогу жана эл аралык кызматташууну чыңдоодогу ролун талкуулоо болду. Тегерек столдун жүрүшүндө студенттер Кыргыз Республикасынын БУУдагы катышуусунун маанисин, ошондой эле өлкөнүн дүйнөлүк жана аймактык процесстерге интеграцияланышындагы эл аралык кызматташуунун механизмдерин карап чыгышты.

Конференциянын алкагында катышуучулар Кыргызстандын БУУ системасы менен кызматташуусунун негизги багыттарын талкуулашты. Алардын ичинде тынчтыкты сактоо демилгелери, Туруктуу өнүгүү максаттарын ишке ашыруу, гендердик теңчилик, адам укуктарын коргоо, ошондой эле климаттык жана экологиялык коопсуздук маселелери бар. Өзгөчө көңүл БУУнун глобалдык баалуулуктарын жайылтууда жаштардын ролуна бурулду.

Иш-чаранын программасына студенттердин постердик баяндамалары, презентациялар, тематикалык квиздер жана практикалык кейстерди талдоо кирди. Конференциянын жыйынтыгында студенттердин мыкты изилдөөлөрү илимий жетекчилер менен биргеликте даярдалып, университеттин жылдык илимий жыйнактарында жарыяланат.