2026-жылдын 23-майында Токмок шаарындагы Борбор Азия Эл аралык университетинин (БАЭУ) базасында эл аралык гуманитардык укук (ЭГУ) боюнча республикалык студенттик интенсив өткөрүлдү.

Иш-чара Кыргыз Республикасында ЭГУну окутуу боюнча Координациялык кеңеш, БАЭУ, КРСУ жана МУА тарабынан Кыргыз Республикасынын Кызыл Жарым Ай Улуттук коомунун жана Кыргыз Республикасындагы Эл аралык Кызыл Крест Комитетинин (ЭККК) Миссиясынын колдоосу менен уюштурулду.

Интенсив Бүткүл дүйнөлүк Кызыл Крест жана Кызыл Жарым Ай күнүнө, ошондой эле маанилүү юбилейге — Кыргыз Республикасынын Кызыл Жарым Ай Улуттук коомунун 100 жылдыгына арналды.

Иш-чарага Кыргыз Республикасынын алдыңкы жогорку окуу жайларынан 8 күчтүү команда катышты. Программа ЭГУ боюнча видеороликтер сынагын жана интерактивдүү интеллектуалдык викторинаны камтыды. Катышуучулар эл аралык гуманитардык укук боюнча терең билимдерин, чыгармачылык потенциалын, логикалык жана сынчыл ой жүгүртүү жөндөмдөрүн көрсөтүштү.

Видеороликтер сынагында командалар ЭГУ темасына арналган үч мүнөттүк видеолорун сунушташты. Көпчүлүк командалар «Манас» эпосу менен ЭГУнун байланышын, ошондой эле Эл аралык Кызыл Крест жана Кызыл Жарым Ай кыймылынын негизги принциптерин чагылдырган темаларды тандашты.

Сынактын жеңүүчүлөрү КРСУнун «Lex nomadica», БАЭУнун «МУЦАшники» жана КР ИИМ Академиясынын «Guarda cor» командалары болушту. Калыстар тобу КРСУнун экинчи командасы — «Каныкейди» да өзгөчө белгиледи.

Интенсивдин экинчи бөлүгүндө төрт раунддан турган ЭГУ боюнча интеллектуалдык викторина өткөрүлдү. Катышуучулар теориялык суроолорго жооп берип, практикалык тапшырмаларды аткарып, логиканы жана кунт коюуну талап кылган суроолорду чечишти.

Викторинанын жыйынтыгында I орунду БАЭУнун «Дюнановцы» командасы, II орунду МУАнын «Ала-Тоо» командасы, III орунду Кыргыз Республикасынын Башкы прокуратурасынын Юридикалык академиясынын «Legati Pacis» командасы ээледи.

Видеороликтер сынагынын жана викторинанын жеңүүчүлөрүнө дипломдор жана эстелик белектер тапшырылды. Бардык командалардын активдүү катышуусу сертификаттар менен белгиленип, катышуучулар ЭГУ боюнча адабияттарды жана биргелешип уюштуруучулардын белектерин алышты.

Республикалык студенттик интенсив университеттер аралык кызматташтыкты чыңдоого, эл аралык гуманитардык укук боюнча билимди жайылтууга жана студенттердин кесиптик, аналитикалык жана командалык компетенцияларын өнүктүрүүгө багытталган маанилүү аянтча болду.