Борбордук Азиядагы Эл аралык университетинде (БАЭУ)«Билим берүү: көйгөйлөрү жана келечеги, баалуулуктар жана инновациялар» аттуу II Эл аралык илимий конференция ийгиликтүү өттү. Ага билим берүү тармагындагы эксперттер, окумуштуулар жана практик-педагогдор катышты. Конференция аралыктан жана салттуу форматта, аралаш түрдө уюштурулду.

Конференциянын ачылышында БАЭУнун вице-президенти Эсентур Табылдиевич Ивагов сөз сүйлөп, ар күнү келечек муундарды тарбиялап-өнүктүрүп жаткан мугалимдердин жана окутуучулардын иши абдан маанилүү экенин белгиледи. Ал окутуучулук — бул жөн гана кесип эмес, бул өзгөчө чакырык жана коом алдында чоң жоопкерчилик экенин айтты. Билим берүү тармагы оор болсо да, ал абдан пайдалуу экенин белгилеп, дал ушул мугалимдер окуучулардын жашоосун өзгөртүп, шыктандырып, алардын потенциалын ачууга шарт түзөрүн баса белгиледи.

Конференциянын катышуучуларын жана конокторун БАЭУнун илимий иштер боюнча комитетинин төрайымы, профессор Раиса Жолдошевна Абдрахманова жана БАЭУнун Гуманитардык илимдер институтунун деканы Роман Викторович Вальваков да куттукташты.

Пленардык жыйындын алкагында билим берүү тармагына байланышкан ар түрдүү темалар боюнча белгилүү адистер баяндама жасашты.

Биринчи баяндаманы Чикагодогу Норт-Парк университетинин (North Park University) философия илимдеринин доктору Деннис Бриколт жасады. Ал «Пандемиядан кийинки онлайн окутуу» темасында сөз сүйлөп, онлайн билим берүүдөгү институционалдык жана техникалык маселелерди, студенттердин катышуусун жана сабакка тартылуусун көзөмөлдөө, талкуу бөлмөлөрүн башкаруу, талкуу такталарын жана онлайн экзамендерди өткөрүү тууралуу айтып берди. Ошондой эле, онлайн сабактардын сапатын көзөмөлдөө, жумуш убактысы, тармактык этика жана студенттер менен үзгүлтүксүз байланышты сактоо маанилүүлүгү белгиленди.

Экинчи баяндаманы Калининград шаарындагы Иммануил Кант атындагы Балтика федералдык университетинин филология илимдеринин кандидаты, доцент Надежда Владимировна Писарь жасады. Ал жаңы сабак өткөрүү форматтары — speed dating, PechaKucha, билим берүү хакатондору жөнүндө айтып, бул форматтардын кытайлык, орус тилин баштап үйрөнүп жаткан студенттер менен сабактарда кандай колдонулуп жаткан тажрыйбасын бөлүштү. Ошондой эле, бул форматтарда ChatGPT нейротармагын колдонуп даярдалган окуу материалдарынын эффективдүүлүгүн талдады.

Үчүнчү баяндаманы Кыргызстанда көп жылдан бери иштеп келе жаткан философия илимдеринин доктору, профессор Лэнс Тилманн жасады. Ал «Ийгиликтүү студенттин сапаттары» темасында изилдөөсүн сунуштап, окуучуларда ийгиликке жеткирүүчү негизги сапаттарды калыптандыруу жана өнүктүрүү жолдору жөнүндө өз пикири менен бөлүштү. Баяндамада студенттердин жеке жана кесиптик өсүүсү үчүн пайдалуу болгон сунуштар айтылды.

Пленардык жыйындын жыйынтык баяндамасын филология илимдеринин доктору, Б.Н. Ельцин атындагы КРСУнун профессору Амангельды Абдыжапарович Бекбалаев жасады. Ал «Хунну — кыргыздардын байыркы ата-бабалары» деген темада доклад окуп, өзүнүн бул теориясын далилдеп, кыргыз элинин тарыхы жана маданий өзгөчөлүгү үчүн маанисин талкуулады.

Пленардык жыйындан кийин конференция иши секцияларда уланды. Секцияларда Испания, Пакистан, Кыргызстан, Казакстан, Россия жана Беларусь өлкөлөрүнөн келген катышуучулар өз баяндамаларын жасашты.

Жыйынтыктап айтканда, бул конференция окумуштууларга, адистерге жана практик мугалимдерге билим берүү тармагындагы көйгөйлөр, мүмкүнчүлүктөр жана келечек багыттары тууралуу пикир алмашууга, илимий изилдөөлөрүн сунуштоого аянтча болуп берди. Борбордук Азиядагы Эл аралык университети мындан ары да билим берүү тармагындагы өнүгүүнү колдоп, ушундай маанилүү иш-чараларды өткөрүүнү улантууну пландап жатат