9-март күнү Борбордук Азиядагы Эл аралык университетинин «Лингвистика. Англис тили» багыты Fulbright программасынын стипендиаты Моника Жангдын катышуусунда студенттер үчүн воркшоп уюштурду.

Өткөн жылы Моника Жанг МУЦАда «Лингвистика. Англис тили» багытында Fulbright программасы аркылуу иштеген. Анын кайрадан келиши студенттер үчүн пайдалуу тажрыйба жана жаңы билим алуу мүмкүнчүлүгүн жаратты.

Воркшоптун жүрүшүндө студенттер TOEFL iBT экзаменинин жаңы 2026-жылдагы форматы, тесттин түзүлүшү, баалоо системасы жана даярдануунун натыйжалуу стратегиялары тууралуу маалымат алышты. Катышуучулар экзамендин ар түрдүү бөлүктөрүнө окшош окуу, угуу жана сүйлөө тапшырмаларын аткарышты.

Ошондой эле иш-чарада чет өлкөдө окууну пландаган студенттер үчүн маанилүү болгон көндүмдөр талкууланды. Моника күчтүү мотивациялык катты (personal statement) кантип жазуу керектиги жана өз ойлорун так жеткирүү тууралуу кеңештери менен бөлүштү.

Воркшоп жандуу жана интерактивдүү форматта өтүп, студенттер эл аралык билим берүү мүмкүнчүлүктөрү, документ тапшыруу процесси жана чет өлкөдө окууга даярдануу боюнча суроолорун беришти.

Сапарынын алкагында Моника General English сабактарына да катышып, студенттер менен баарлашып, АКШдагы академиялык жана маданий жашоо тууралуу айтып берди.

Бул иш-чара «Лингвистика. Англис тили» багыты тарабынан студенттерге эл аралык академиялык мүмкүнчүлүктөрдү кеңейтүү жана дүйнөлүк билим берүү мейкиндиги менен байланышты бекемдөө максатында уюштурулду.